புது தில்லி: அரசின் கலப்பு பெட்ரோல் கொள்கைக்கு எதிராகப் போராட்டங்கள் வலுத்து வரும் நிலையில், “தூய பெட்ரோல் என்ன ‘யாருடைய அப்பன் வீட்டிலிருந்தா’ வரும்?” என்று பாரதிய ஜனதா கட்சியின் (பாஜக) நாடாளுமன்ற உறுப்பினர் ஒருவர் கேள்வி எழுப்பியுள்ளார்.
எத்தனால் கலந்த பெட்ரோல் பயன்பாடு விவகாரத்தில் மோடி அரசுக்கு எதிராக காங்கிரஸ் மற்றும் பிற எதிர்க்கட்சிகள் தங்கள் விமர்சனங்களை தீவிரப்படுத்தி வரும் சூழலில், ரேவா தொகுதி நாடாளுமன்ற உறுப்பினர் ஜனார்தன் மிஷ்ராவின் இந்தக் கருத்து சர்ச்சையை மேலும் வலுப்படுத்தும் வகையில் அமைந்துள்ளது.
ரேவா விமான நிலையத்தில் நடைபெற்ற நிகழ்ச்சி ஒன்றில் எத்தனால் கலந்த பெட்ரோலை எதிர்ப்பவர்களைக் குறிவைத்து பேசிய மிஷ்ரா, எத்தனால் பயன்பாடு பலனளிக்காது என்றும் ‘தூய’ பெட்ரோலை மட்டுமே பயன்படுத்த வேண்டும் என்றும் கூறி போராட்டங்கள் நடத்தப்படுவதாகக் குறிப்பிட்டார். “நாட்டில் சுத்தமான பெட்ரோலே இல்லாதபோது, அது என்ன உங்கள் அப்பாவின் வீட்டிலிருந்தா வரப்போகிறது?” என்று அக்கொள்கையை விமர்சிப்பவர்களைப் பார்த்துக் கேள்வி எழுப்பினார் அவர்.
ரேவா நகரை போபால் மற்றும் கொல்கத்தாவுடன் இணைக்கும் புதிய விமான சேவைகளின் தொடக்க விழாவில் கலந்துகொண்ட மிஸ்ரா, நாட்டின் பொருளாதார நிலை மற்றும் எத்தனால் கொள்கை குறித்தும் பேசினார். பிரதமர் மோடி இந்தியாவைச் சுயசார்பு கொண்ட நாடாக மாற்ற விரும்பும் வேளையில், சில “தேசவிரோத சக்திகள்” அதற்குத் தடைகளை ஏற்படுத்துவதாக அவர் கூறினார். நாடு முன்னேற்றத்தை நோக்கிப் பயணிக்கும்போது, பிரதமரின் நிலையைக் குலைக்க உலகம் முழுவதும் முயற்சித்து வருவதாகவும் மிஸ்ரா குறிப்பிட்டார்.
எத்தனால் கலப்பு கொள்கையை ஆதரித்துப் பேசிய அந்த நாடாளுமன்ற உறுப்பினர், இந்தியா தனது கச்சா எண்ணெயில் 20 சதவீதத்தை மட்டுமே உற்பத்தி செய்வதாகவும், மீதமுள்ளதை இறக்குமதி செய்ய வேண்டியுள்ளதாகவும் கூறினார். “எரிவாயு மற்றும் எண்ணெயைப் பொறுத்தவரை, நாம் பயன்படுத்தும் எண்ணெயில் 20 சதவீதம் மட்டுமே உள்நாட்டில் உற்பத்தி செய்யப்படுகிறது. 80 சதவீதத்தை வெளிநாடுகளிலிருந்து இறக்குமதி செய்ய வேண்டியுள்ளது. போர் மூண்டுள்ளது; ஹார்முஸ் நீரிணை (Strait of Hormuz) மூடப்பட்டுள்ளதால், 18,000 கி.மீ சுற்றளவு கொண்ட மாற்றுப் பாதையின் வழியாகவே நாட்டிற்கு எண்ணெய் கொண்டு வரப்படுகிறது,” என்று அவர் கூறினார்.
“இருப்பினும், பெட்ரோலில் 20 சதவீத எத்தனால் கலக்கப்பட வேண்டும் என்று பிரதமர் மோடி கூறும்போது, ’எத்தனால் வேண்டாம், சுத்தமான பெட்ரோலை மட்டும் கொடுங்கள்’ என்று கூறி மக்கள் போராட்டம் நடத்துகிறார்கள். சுத்தமான பெட்ரோல் என்ன உங்கள் அப்பாவின் வீட்டிலிருந்தா வரப்போகிறது? நாட்டிலேயே சுத்தமான பெட்ரோல் கிடைக்காதபோது, அது எங்கிருந்து வரும்?”
பின்னர், வாகனங்கள் 100 சதவீத எத்தனாலில் இயங்கும் பிரேசில் உள்ளிட்ட நாடுகளின் உதாரணங்களை மிஸ்ரா சுட்டிக்காட்டினார். “எத்தனால் உற்பத்தியில் பிரேசில் உலகிலேயே முதலிடத்தில் உள்ளது. அங்கு வாகனங்கள் எந்தச் சிக்கலுமின்றி 100 சதவீத எத்தனாலில் இயங்குகின்றன. எத்தனால் வாகனத்தின் இன்ஜின்களைப் பாதிப்பதில்லை என்பதை வாகன நிபுணர்களும் மெக்கானிக்குகளும் ஒப்புக்கொள்கிறார்கள்; அப்படியிருந்தும் இந்தியாவில் இதற்குத் தேவையற்ற எதிர்ப்பு கிளம்புகிறது.”
சர்ச்சைகளில் சிக்குவது மிஸ்ராவுக்குப் புதிதல்ல. நவம்பர் 2022-ல், ரேவாவில் நடைபெற்ற நீர் பாதுகாப்பு குறித்த கருத்தரங்கு ஒன்றில் அவர் பேசிய கருத்துகள் பெரும் பரபரப்பை ஏற்படுத்தின: “நிலங்கள் வறண்டு வருகின்றன, நீரைச் சேமிக்க வேண்டும்… மது அருந்துங்கள், புகையிலை மெல்லுங்கள், கஞ்சா அல்லது தின்னர் (thinner) மற்றும் சொல்யூஷனை (solution) நுகருங்கள்; ஆனால் நீரின் முக்கியத்துவத்தைப் புரிந்துகொள்ளுங்கள்.” அதே ஆண்டின் முற்பகுதியில், அவர் சுத்தம் செய்யும் காட்சி வீடியோவாகப் பதிவாகியிருந்தது. பள்ளி ஒன்றில் கழிப்பறையைத் தனது வெறும் கைகளால் சுத்தம் செய்தார்.
மிஷ்ராவின் சமீபத்திய கருத்துகள் அடங்கிய காணொளியைப் பகிர்ந்துகொண்ட மூத்த காங்கிரஸ் தலைவரான சுப்ரியா ஷ்ரினேட் இவ்வாறு கூறினார்: “இவர் மத்தியப் பிரதேசத்தின் ரேவா தொகுதியைச் சேர்ந்த பாஜக எம்.பி. ஜனார்தன் மிஷ்ரா. E20 எரிபொருளால் மக்களின் வாகனங்கள் பழுதடைந்து வருகின்றன; ஆனால், இவரின் ஆணவத்தைப் பாருங்கள்.”
E20 (எத்தனால் கலந்த பெட்ரோல்) விவகாரத்தை மக்களிடமிருந்து செய்யப்படும் நேரடித் திருட்டு என்று குறிப்பிட்ட காங்கிரஸ் தலைவர் ராகுல் காந்தி, கடந்த வாரம் இது குறித்து “மிகப் பெரிய அளவில்” போராடப்போவதாக உறுதியளித்தார். இது ஒரு “பெரிய பிரச்சினை” என்றும், மக்களின் கார்கள், ஸ்கூட்டர்கள் மற்றும் அவர்களின் வாழ்க்கையை இது “அழித்து வருவதால்” காங்கிரஸ் இதனை “மிகப் பெரிய அளவில்” கையில் எடுக்கும் என்றும் கூறி அவர் ‘எக்ஸ்’ (X) தளத்தில் காணொளி ஒன்றை வெளியிட்டார். “இதில் ஏதோ ஒரு சிறிய குறைபாடு மட்டுமல்ல, ஒட்டுமொத்த விவகாரமே மோசமானது” (இந்தியில்: “Daal mein kaala nahi, poori daal hi kaali hai”) என்றும் அவர் குறிப்பிட்டார்.
எத்தனால் கொள்கை விவகாரத்தில் மோடி அரசை எதிர்க்கட்சிகள் விமர்சித்து வருகின்றன; ஆம் ஆத்மி கட்சியும் (AAP) E20 எரிபொருளுக்கு எதிராக நாடு தழுவிய அளவில் பொதுமக்களுடனான கலந்துரையாடல் கூட்டங்களை (town hall meetings) நடத்தத் தொடங்கியுள்ளது. வாகன உரிமையாளர்களைச் சந்தித்துப் பேசுவதும், எத்தனால் கலந்த பெட்ரோலால் ஏற்படும் சிக்கல்கள் குறித்த கருத்துகளைக் கேட்டறிவதுமே இதன் நோக்கமாகும்.
